اس نے ایک اندھیری دنیا میں آنکھ کھولی،،،مگر اس کی آنکھیں روشن تھیں۔۔۔وہ روشنی دیکھنا چاہتا تھا۔۔خوبصورتی دیکھنا چاہتا تھا۔۔۔اپنے من میں وہ خواہشیں چھپائے بیٹھا تھا جسکی تمنا کرنے کا حق اسے نہیں تھا
کبھی کبھی وہ کسی کو بنا بتائے ہی دور نکل جاتا۔پھیلی سڑکوں کو تاکتا رہتا۔۔۔۔شاپنگ مال سے نکلنے والے ہنستے چہروں کو دیکھتا رہتا۔۔
اس کا ننھا ذہن سمجھ نہیں پاتا تھا کہ یہ لوگ اتنے خوش کیسے ہیں۔۔۔ان کے بچوں کے چہروں پر اتنی خوشی کیسی ہے۔۔۔پیار اور والہانہ انداز سے جب
کوئی ماں اپنے بچے کو پکارتی تھی تو وہ سوچتا اس کی ماں تو اسے ہمیشہ ہی دھتکارتی رہی ہے۔۔۔۔اس کے باپ کے پاس سوائے گالیوں کے اسے دینے کیلئے کچھ نہیں تھا۔۔۔
پوتا بھی کیسے۔۔۔گداگروں کے پاس اگر کچھ ہو بھی تو وہ فقیر ہی رہتے ہیں۔۔۔
میلے کچیلے ماحول، بلبلاتی بدبو مارتی اسکی بستی میں اسکا دم گھٹ جاتا تھا۔۔۔جہاں انسان کیڑے مکوڑوں کی طرح رہتے تھے ۔۔۔
اسے اپنے بھائی بہن سے بھی کوئی سروکار نہیں تھی،،،،گندے ادھ ننگے بھائی بہن سے اسے گھن آتی۔۔۔وہ سوچتا تھا وہ انھیں اچھے کپڑے پہنائے گا۔۔خوشبو لگائے گا
اور شہر کی سیر کرائے گا،،،،
مگر یہ سب وہ کیسے کرے گا اسے یہ معلوم نہیں تھا،،،بس خواہشیں تھیں،،جنھیں سوچ کر وہ دل ہی دل میں خوش ہتا تھا،،
جب اسکا باپ اسے کہتا کہ تو بھی میری طرح فقیر بنے گا تو اسکا دل کرتا کہ وہ اپنے باپ کا گلا گھونٹ دے،،،
وہ اسکی طرح سڑکوں پر لوگوں کی منتیں کرتی ہوئی زندگی نہیں گزارنا چاہتا تھا۔۔۔۔
وہ دنیا دیکھنا چاہتا تھا گھومنا چاہتا تھا۔۔۔۔ اپنی دنیا کو حا صل کرنا چاہتا تھا ،،گداگروں کی اس بستی میں ایک باغی پیدا ہوا تھا۔۔۔مگر اسکی بغاوت بس اسکے دل تک ہی محدود تھی۔۔۔
آج بھی وہ سڑکوں پر گھنٹوں تک آوارہ گردی کرنے کے بعد اپنی کھولی میں لوٹا تو ماں باپ دونوں کو ریز گاری گنتے ہوئے پایا۔۔۔
اسے دیکھ کر اسکے باپ نے ایک نفرت بھری نگاہ اس پر ڈالی۔۔
کہاں گیا تھا بے تو۔۔۔
باپ سے ہمیشہ وہ ڈرتا تھا۔۔۔اسکا دماغ گھوم جاتا تو اگلے دن اسکا بدن سوجا ہوا ہوتا۔۔۔
وہ ۔۔۔۔وہ۔۔۔ایسے ہی بس نذیرے کے ساتھ تھا ابا۔۔۔
جھوٹ بولتا ہے حرامی۔۔۔
اسکے باپ نے اسے ایک جھانپڑ رسید کیا۔۔۔
درد کی ٹیسیں اسے اپنے گالوں پر محسوس ہوئیں۔۔۔گالی اور تھپڑ سے اسکا جسم اور روح دونوں گھائل ہو گئے تھے۔۔
مارتا کیوں ہے فقیرے۔۔۔
اسکی ماں نے اسے اپنے پیچھے چھپا لیا۔۔۔ان مو قعوں پر اسکی ماں اکثر ڈھال بن جایا کرتی تھی۔۔
بچہ ہے چھوڑ دے۔۔۔میں سمجھائوں گی اسے،،،ماں نے اسکا غصہ ٹھنڈا کرنے کی کوشش کی
ہاں سمجھا اسے۔۔۔اور اب یہ بچہ نہیں رہا۔۔۔کھا کھا کر جسم پھلا رہا ہے دیکھتی نہیں۔۔۔لگتا ہے یہ فقیر کی اولاد ہے،،،اسے دیکھ کر کون بھیک دے گا مجھے،،،،
اس کے باپ کی آنکھیں لال انگارہ ہو رہی تھیں۔۔۔
میں سمجھائوں گی اسے، بس تو جا اب۔۔۔۔
ماں نے اسکی منت کی
ابا۔۔۔میں تیرے ساتھ بھیک نہیں مانگوں گا سن لے،،،،
اسکے دل کی بات آج اس کی زبان پر آگئی تھی۔۔
کیا بولا بے۔۔۔۔بھیک نہیں مانگے گا،،،،اسکے باپ کا پارہ پھر چڑھ گیا۔۔۔۔
اس سے پہلے کو وہ اسے پھر مارتا اس کی ماں نے اسے پھر اپنے پیچھے کر لیا۔۔۔
میں کہتی ہوں تو جا،،،بچہ ہے بک رہا ہے اپنی۔۔۔۔۔۔۔جائے گا کیسے نہیں تیرے ساتھ جو تو کہے گا وہی کرے گا۔۔۔پر مار مت بس اسے۔۔۔
ماں کی آواز میں نہ جانے کیا تھا کہ غصے سے بھرا فقیرا چپ ہو گیا۔۔۔۔
جائے گا کیسے نہیں میرے ساتھ۔۔۔پر ایسے نہیں۔۔۔کچھ نہ کچھ کرنا پڑے گا۔۔۔۔
فقیرے کے لہجے میں نہ جانے کیا تھا کہ اسکے بدن میں سنسنی ڈوڑ گئی۔۔۔۔
فقیرا نے ایک گہری نظر اس پر ڈالی اور باہر نکل گیا۔۔۔۔۔
وہ اپنی ماں کے پہلو سے لگ کر پھوٹ پھوٹ کر رو دیا۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رات کو اسکا باپ آیا تووہ سونے ہی لگا تھا ۔۔ اس نے دیکھا اسکے ساتھ ایک آدمی اور تھا۔۔۔۔کالا سانڈ جیسا جسم۔۔۔تیز آنکھوں سے وہ اسے ہی گھور رہا تھا
اسے دیکھ کر ہی اسے خطرے کی گھنٹی بجتی محسوس ہوئی۔۔۔۔۔
ایک خوف کا احساس اسے جھنجوڑ گیا۔۔۔۔
چل نواز میرے ساتھ۔۔۔۔
اسکے باپ نے اسے کندھے سے پکڑا،،،خلاف توقع آج اسکا لہجہ تھوڑا نرم تھا
پ پ پر کہاں ۔۔۔اس نے قدرے جھجھکتے ہوئے کہا
تو چل بس سوال مت کر۔۔۔کام سے جانا ہے فکر نہ کر تھؤڑا گھوم بھی لیں گے۔۔
اس نے گردن موڑ کر اپنی ماں کی طرف دیکھا۔۔۔۔مگر وہ خالی آنکھوں سے چھت کو گھور رہی تھی۔۔۔۔اسے سمجھ نہیں آرہی تھی کیا کرے،،،
آج ماں بھی اسے بچا نہیں رہی تھی،،،ناں کرتا تو باپ اسے ادھیڑ کر رکھ دیتا۔۔۔۔
مری مری سی آواز سے اس نے ماں کو پکارا،،،
امان میں جائوں۔۔۔۔اس سوال میں ایک درد تھا۔۔۔التجا تھی جیسے کہہ رہا ہو ماں میں نہیں جانا چاہتا مجھے روک لے۔۔۔
اس درد کو ماں نے محسوس کرلیا تھا جبھی چھت کو گھورتی آنکھوں میں نمی آگئی۔۔۔مگر اسکی ماں نے کچھ نہیں کہا۔۔۔۔
اس کا دل کٹ کر دہ گیا۔۔۔۔
ابے چل آجا ۔۔۔تجھے ٹھنڈا بھی کھلائوں گا۔۔۔شاباش چل میرا بچا۔۔۔
اسکے باپ نے ہنستے ہوئے اس کا ہتھ پکڑ لیا۔۔۔۔
اسنے دیکھا اسکے ساتھ آنے والے سانڈ نما آدمی کے چہرے پر کوئی احساس نہیں تھا۔۔۔وہ بس اسے ایسے گھور رہا تھا جیسے کوئی شکاری اپنے شکار کو گھورتا ہے۔۔۔ اسکی نظروں سے اسے خوف محسوس ہو رہا تھا۔۔مگر باپ کی بات وہ ٹال نہیں سکتا تھا کمزور جو تھا،،
چل شاباش۔۔۔۔۔
اس کے باپ نے اسکی پیٹ تھپتھپائی۔۔۔
باہر بستی میں رات کا اندھیرا پھیلا ہوا تھا۔۔۔۔
آج یہ اندھیرا کسی اور کی زندگی میں بھی چھانے والا تھا۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہر کے پوش علاقے کے بڑے سے شاپنگ مال کے ساتھ وہ سڑک پر چٹائی پر بیٹھا تھا۔۔۔۔۔بھیک کا کٹورا اس کے سامنے تھا۔۔۔اسکے باپ نے اسے ساری ہدایت کر دیں تھیں۔۔۔ اپنے برسوں کے ہنر کی تمام موٹی موٹی موٹی باتیں وہ اسے سکھا چکا تھا۔۔۔۔۔اب اسے یہاں شام تک ان پر عمل کرنا تھا
فقیرے نے شام کو آنے کا کہا تھا۔۔۔۔
آج اسکا گداگری میں پہلا دن تھا۔۔۔۔
اسکے ساتھ کئی اور بھی فقیر اہل کرم کا تماشہ دیکھنے بیٹھے تھے۔۔۔۔
وہ خالی خالی آنکھوں سے کشکول کو تک رہا تھا۔۔۔۔اسے لگا جیسے اب وہ اس جگہ سے کبھی نہیں اٹھ پائے گا
جس ماحول سے اس نے بغاوت کا سوچا تھا۔۔اس ماحول کے ایک ہی وار نے اسے ہمیشہ کیلئے اپنی گرفت میں لے لیا تھا ۔۔۔۔
اسکے باپ نے فقیر ہونے کا حق ادا کر دیا۔۔۔اپنے جیسا بنانے کا کہا تھا۔۔۔وہ قول کا سچا نکلا،،،،
اس نے جھلملاتی آنکھوں سے اپنی دونوں ٹانگوں کی طرف دیکھا،،،،
جو اب گھٹنے تک کٹی ہوئی تھیں۔۔۔
ساتھ ہی بیساکھی رکھی تھی۔۔۔جو شائد اب عمر بھر اس کی رفیق تھی،،،
اچانک ایک آواز نے اسے چونکا دیا۔۔۔۔
یہ لو بیٹا۔۔۔۔
چہرہ اٹھا کر دیکھا تو ایک عورت ترحم آمیز نظروں سے اسے دیکھ رہی تھی۔۔۔اسکے ہاتھ میں دس کا نوٹ تھا،،جو اسنے اسکی طرف بڑھایا ہوا تھا۔۔۔۔۔اسکی آنکھوں کی نمی کو عورت نے صاف محسوس کیا۔۔۔۔۔اس کا دل بھی پسیج کیا۔۔۔۔یہ رکھ لو،،،،
اسنے نرمی سے کہا،،،،
وہ خالی نظروں سے دس کے نوٹ کو دیکھ رہا تھا۔۔۔۔۔
اسنے سامنے رکھا کشکول اٹھایا، عورت نے دس کا نوٹ اس میں ڈالا اور اپنی گاڑی کی طرف بڑھ گئی،،،،
اچانک اسکا دل بھر آیا،،،، ضبط کے سارے بندھن ٹوٹ گئے ۔۔۔دل کے طوفان نے باہر نکلنا چا ہا
اسنے کشکول اوپر کیا۔۔اور فلک شگاف آواز میں صدا لگائی
اللہ کے نام پر دے جا۔۔۔اللہ کے نام پر معذور کو دیتا جا،،،،،
وہ چیخ رہا تھا،،،،زور زور سے حلق پھاڑ کر مگر اس کی چیخ میں چھپے احتجاج کو کوئی نہیں سمجھ پا رہا تھا
اسکی آواز کے درد نے سارے ماحول کو سوگوار کر دیا تھا۔۔۔
کوئی تبصرے نہیں:
ایک تبصرہ شائع کریں
برائے مہربانی اپنی قیمتی رائے ضرور دیں